Davlatimiz rahbari tomonidan Respublikamiz hududlarini ko‘kalamzorlashtirish darajasini 8 foizdan 30 foizga yetkazish maqsadida "Yashil makon" umummilliy loyihasi hayotga tadbiq etildi. O‘tgan salkam 3 yil mobaynida mamlakatimiz hududlarida minglab manzarali, mevali daraxt va buta ko‘chatlari o‘tqazilib, yashil hududlarni kengaytirishga e’tibor kuchaytirildi. 

Ayni kunlarda ekilgan ko‘chatlarni sifatli parvarishlash, sug‘orish hamda kasallik va zararkunandalarga qarshi kurashish ishlarini agrotexnik qoidalar asosida tashkil etishni to‘g‘ri yo‘lga qo‘yish dolzarb vazifaga aylangan. Shu maqsadda Tabiat resurslari vazirligi tomonidan barcha viloyatlarda "Yashil zamin" fondi bilan hamkorlikda amaliy seminarlar o‘tkazilmoqda.

Bugun Xorazm viloyati Urganch shahridagi "Yoshlar markazi" binosining majlislar zalida, Shuningdek hududdagi bog'da (amaliyot) bo‘lib o‘tgan amaliy seminar ham xuddi shu mavzuga bag‘ishlandi. Seminarga Tabiat resurslari vazirligining, o'rmon xo'jalikgi agentligi mas’ullari, shuningdek shahar va tuman hokimlarining o‘rinbosarlari, Obodonlashtirish boshqarmalari boshlig'lari va sohaga aloqador tashkilot, korxonalar vakillari ishtirok etdi.

Seminar davomida Tabiat resurslari vazirligi "Yashil makon" umummiliy loyihasini tashkillashtirish va monitoring boshqarmasi boshlig‘i Gʻ.Qarshiboyev so‘zga chiqib,  loyiha doirasida ekilgan daraxt va buta ko‘chatlarini parvarish qilish, yozning jazirama issiq kunlarida ularni asrab-avaylash, iqlim sharoitiga mos bo‘lgan ko‘chatlarni tanlash ularni mas’ularga topshirish va ko‘chat ekishni shaharsozlik loyiha hujjatlariga tayangan holda tashkil etish masalalariga asosiy e’tiborni qaratdi.

Shuningdek, tadbir yakunida "Yoshlar markazi"  bog‘i misolida hozirgi kunda daraxt ko‘chatlariga zarar keltirayotgan  zararkunandalarga qarshi kurashish amaliyoti ko‘rsatib berildi.