Bosh prokuror oʼrinbosari Sherzod Toʼxtaboev boshchiligidagi ishchi guruhi Xorazm viloyati Yangibozor tumanidagi "Xorazm tabiat milliy bogʼi"ga qarashli suniy pitomnik hududida boʼlib, amalga oshirilgan hamda kelgusidagi amalga oshirilishi rejalashtirilgan ishlar bilan tanishdilar. 

Yangibozor tumanidagi suniy pitomnik Buxoro bugʼusi va jayronlarni boqishga toʼlik tayyorlangan boʼlib, inspektorlar tomonidan tabiat bogʼiga  chegaradosh boʼlgan fermer xoʼjaliklari va boshqa yer egalari bilan yongʼin xavfsizligi boʼyicha doimiy ravishda uchrashuvlar va tushuntirish ishlari olib borilmoqda.
 
Hududlarda yongʼinni oldini olish boʼyicha burchaklar tashkil qilingan. 
Bugungi kunda yoʼqolib borayotgan noyob hayvonlarni koʼpaytirish va  ekoturizmni rivojlantirish maqsadida tabiat bogʼining suniy pitomnigiga 10 ta Buxoro bugʼisi  olib kelingan. 

Tabiat bogʼiga tashrif buyuruvchilarga qulaylik yaratish maqsadida 
6 ta ekoturizm  marshrutlari ishlab chiqilib, yoʼl koʼrsatuvchi  koʼrsatkich belgilar oʼrnatish ishlari olib borilgan. 

Bugungi kunda, tabiat bogʼining hududlarida jami umurtqali hayvon turlarining 360 tasi va ulardan 53 ta halqaro va Oʼzbekiston “Qizil Kitobi”ga kiritilgan turlari doimiy va mavsumiy uchraydi. Bu turlar, “Qizil kitob”ga kiritilgan turlarning 43 % ni tashkil qiladi.

Tabiat bogʼi hududlarida 240 dan ziyod oʼsimlik turlari uchraydi va ulardan 31 turi “Qizil kitob”ga kiritilgan noyob va yoʼqolib borayotgan turlar hisoblanadi. Ular “Qizil kitob”ga kiritilgan noyob va yoʼqolib borayotgan oʼsimlik  turlarining 10 % ni tashkil qiladi. Bundan tashqari, dorivor oʼsimliklarning 50 dan ziyod turlari aniqlanib, ularni asrash va koʼpaytirish tadbirlari amalga oshirilmoqda.

Milliy bogʼ va pitomnik ishga tushirilishi bilan bu erda viloyatdagi eng yirik ekoturizm kompleksini tashkil qilish rejalashtirilgan. Bugungi kunda tabiat bogʼining suniy pitomnigiga 10 ta Buxoro xonguli (bugʼu) olib kelib, parvarishlanmoqda. Yaqin kunlarda yana 45 bosh bugʼi olib kelib, ushbu hududga qoʼyib yuborilishi reja qilingan.